زرداری کے بعد حمزہ شہباز کی گرفتاری کیلیے نیب تیار

لاہور (میڈیا 92 نیوز آن لائن ) قومی احتساب بیورو(نیب) نے پنجاب اسمبلی میں اپوزیشن لیڈر اور ن لیگی رہنما حمزہ شہباز کی آج گرفتاری کے لیے حکمت عملی تیار کر لی ہے۔

آمدن سے زائد اثاثے، رمضان شوگر ملز اور صاف پانی کیس میں ن لیگی رہنما کی عبوری ضمانت کا آج آخری دن ہے۔

لاہور ہائی کورٹ کے جج جسٹس مظاہر علی اکبر نقوی حمزہ شہباز کی عبوری ضمانت میں توسیع کی درخواست پر آج سماعت کریں گے۔

ذرائع کے مطابق درخواست ضمانت منسوخ ہونے پر نیب ن لیگی رہنما کو گرفتار کر سکتا ہے جس کے لیے حکمت عملی تیار کرلی گئی ہے۔ عدالت میں سماعت کے موقع پر نیب کی انٹیلیجنس ونگ کی ٹیم بھی موجود رہے گی۔

امن و امان کی صورتحال برقرار رکھنے کے لیے لاہور ہائی کورٹ کے باہر پولیس کی بھاری نفری تعینات کر دی گئی ہے۔

پولیس نے ن لیگی کارکنان کو اندر جانے سے روک دیا ہے اور لاہور ہائی کورٹ کا داخلی دروازہ بھی بند کردیا گیا۔

گزشتہ سماعت پر نیب پراسیکیوٹر نے کہا حمزہ شہباز کے اثاثوں میں کروڑوں روپے کا اضافہ ہوا لیکن وہ ذرائع بتانے میں ناکام رہے۔
وکیل حمزہ شہباز نے کہا کہ نیب نے ریفرنس دائر کرنے کے بعد میرے موکل کو نامزد کیا، ایڈووکیٹ سلمان بٹ کے بیرون ملک ہونے کے باعث استدعا ہے کہ کیسز کی سماعت دس روز کیلئے ملتوی کی جائے۔

جسٹس مظاہر علی نے ریمارکس دیئے کہ درخواست ضمانت قبل از گرفتاری میں اتنا وقت نہیں دیا جاتا،عدالت نے دلائل سننے کے بعد حمزہ شہباز کی عبوری ضمانت میں آٹھ روز کی توسیع کی تھی اور نیب کو گیارہ جون تک حمزہ شہباز کو گرفتار کرنے سے بھی روک دیا گیا تھا۔

خیال رہے کہ قومی احتساب بیورو (نیب) نے جعلی اکاؤنٹس کیس میں سابق صدر اور پاکستان پیپلز پارٹی (پی پی پی) کے شریک چیئرمین آصف علی زرداری کو گزشتہ روز گرفتار کر لیا تھا۔