بالی ووڈ فلم ’’نمستے انگلینڈ‘‘ لوگوں کے دل جیتنے میں ناکام ہوگئی

ممبئی:(شوبز ڈیسک/میڈیا92نیوز) بالی ووڈ اداکارہ پرینیتی چوپڑا اور ارجن کپور کی فلم ’’نمستے انگلینڈ‘‘ شائقین کومتاثر کرنے میں ناکام ہوگئی۔
حال ہی میں ریلیز ہونے والی فلم ’’نمستے انگلینڈ‘‘ اکشے کمار اورکترینہ کیف کی فلم ’’نمستے لندن‘‘ کا سیکوئل ہے۔ ’’نمستے انگلینڈ‘‘ 2007 کی کامیاب ترین فلم تھی جسے شائقین کی جانب سے بہت زیادہ پسند کیا گیا تھا لہٰذا شائقین کو ’’نمستے انگلینڈ‘‘ سے بھی بہت زیادہ امیدیں وابستہ تھیں جب کہ فلمی تجزیہ نگاروں کا خیال تھا کہ یہ فلم بھی پچھلی فلم کی طرح کامیابی کے جھنڈے گاڑے گی لیکن ہوا اس کے برعکس۔
ارجن کپور اورپرینیتی چوپڑا کی ہٹ جوڑی، بڑا بجٹ (تقریباً 60 کروڑ روپے )، انگلینڈ کے خوبصورت مقامات پر شوٹنگ کے باوجود ’’نمستے انگلینڈ‘‘ شائقین کو متاثر کرنے میں ناکام رہی اور ریلیز کے پہلے روز صرف ایک کروڑ 75 لاکھ کا بزنس کرنے میں ہی کامیاب ہوسکی ہے۔
جب کہ ’’نمستے انگلینڈ‘‘کے ساتھ ریلیز ہونے والی آیوشمان کھرانا کی کم بجٹ کی فلم’’بدھائی ہو‘‘ باکس آفس پر شاندار بزنس کرنے میں کامیاب ہوگئی ہے۔ تقریباً 30 کروڑ کے بجٹ سے بننے والی فلم نے ریلیز کے پہلے روز 7 کروڑ29 لاکھ کا بزنس کیا ہے۔ تجزیہ نگاروں نے ’’نمستے انگلینڈ‘‘ کے مقابلے’’بدھائی ہو‘‘ کوکامیاب فلم قرار دے دیا ہے۔