حادثے کا شکار انڈونیشین مسافر طیارے کا بلیک باکس مل گیا

جکارتہ(نیٹ نیوز) رواں ہفتے حادثے کا شکار ہونے والے انڈونیشین مسافر طیارے کا بلیک باکس تین روز کی مسلسل تلاش کے بعد مل گیا۔

لائن ایئرلائن کا طیارہ جکارتہ ایئرپورٹ سے پرواز بھرنے کے کچھ ہی دیر بعد سمندر میں گر کر تباہ ہوگیا تھا جس میں سوار تمام 189 مسافر ہلاک ہوئے۔

حادثے کے بعد طیارے کے بلیک باکس کی تلاش کے لیے غوطہ خوروں کا زیر سمندر آپریشن تین روز تک جاری رہا اور غوطہ خوروں نے سمندر کی تہہ میں جاکر طیارے کا بلیک باکس تلاش کرلیا جس سے نئے طیارے کو پیش آئے حادثے کی وجوہات جاننے میں مدد ملے گی۔

انڈونیشین مسافر طیارے کا بلیک باکس حاصل کرنے کیلئے زیرسمندر آپریشن

سرچ اینڈ ریسکیو ایجنسی کے ترجمان یوسف لطیف کا کہنا ہے کہ بلیک بلاکس تلاش کرلیا گیا جس کے بعد اسے حادثے سے متعلق معلومات حاصل کرنے کے لیے منتقل کردیا گیا ہے۔

لائن ایئرلائن کا طیارہ بوئنگ 737 میکس 8 جیٹ جکارتہ ایئررپورٹ سے پرواز بھرنے کے فوری بعد ہی سمندر میں گر گیا تھا جسے بھارتی پائلٹ چلا رہے تھے۔

یاد رہے کہ انڈونیشین ایوی ایشن کی تاریخ کا یہ سب سے بڑا سانحہ ہے جس میں 189 مسافر ہلاک ہوئے، لائن ایئر کا طیارہ بوئنگ 737 بالکل نیا طیارہ تھا اور اس نے 15 اگست کو ہی اپنی پہلی پرواز کے لیے اڑان بھری تھی۔