اسلام آباد (سپورٹس ڈیسک/ میڈیا92 نیوز)صدر مملکت ممنون حسین نے کہا ہے کہ پی ایس ایل ٹورنامنٹ کو پاکستان میں عالمی کرکٹ کی واپسی کا کریڈٹ جاتا ہے ،پی ایس ایل سے قومی کر کٹ کو بہت فائدہ ہوا ۔پی ایس ایل کے انعقاد سے دہشت گردی کو شکست ہوئی اور امن جیت گیا ۔عوام کی بھر پور اور کھیلوں سے محبت کر نے والے لوگ ہیں ۔صدر مملکت نے یہ بات ایوان صدر میں پی ایس ایل ٹیم اور ان کی مینجمنٹ سے گفتگوکرتے ہوئے کہی جھنوں نے سید علی رضا نقوی کی قیادت میں صدر مملکت سے ملاقات کی ۔صدر مملکت نے کہا کہ کرکٹ کی بحالی سے کھیلوں کی صنعت کو بھی فروغ ملے گا ۔پاکستان میں کھیلوں کے فروغ سے معیشت میں بہتری آئے گی ،خاص طور پر کھیلوں کا سامان بنانے والی صنعت میں روزگار کے مواقع پیداہوں گے ۔کھیلوں میں برداشت اور سپورٹس مین سپرٹ کی سب سے زیادہ ضرورت ہوتی ہے اور کھلاڑی اپنی کارکردگی پر کبھی غرور نہ کر یں اس سے زوال کا راستہ کھلتا ہے ۔
