سانحہ کارساز کی دسویں برسی، یادگار شہدا پرجیالوں کی آمد

کراچی(میڈیا پاکستان) پاکستان پیپلز پارٹی کے تحت سانحہ کارساز کے شہدا کی 10 برسی آج منائی جائے گی۔سانحہ کارساز کے حوالے سے پیپلز پارٹی کے تحت حیدررآباد میں عوامی جلسہ منعقد ہوگا جس سے چیئر مین پیپلز پارٹی بلاول بھٹو زرداری خطاب کریں گے، سانحہ کارساز کی دسویں برسی کی مناسبت سے گزشتہ روزکراچی میں جائے حادثہ کارسازکے مقام پر دعائیہ تقریب منعقد کی گئی جس میں پیپلز پارٹی کے مرکزی رہنما اور سابق وزیر اعلیٰ سندھ سید مراد علی شاہ ، کراچی ڈویژن کے جنرل سیکریٹری سعید غنی، سیکریٹری اطلاعات شہلا رضا، شعبہ خواتین کراچی صدر ایم این اے شاہدہ رحمانی، جنرل سیکریٹری شاہینہ شیر علی، سیکریٹری اطلاعات شاہینہ سعیدہ سمیت پارٹی رہنماؤں، کارکنوں اور سانحے کے شہداکے اہلخانہ نے کثیر تعداد میں شرکت کی۔
شہدا کی یاد میں شمعیں روشن کی گئیں، شہدا کے ایصال ثواب کے لیے قران خوانی آج کارساز پر ہوگی، تقریب کے بعد میڈیا سے گفتگو کرتے ہوئے سید قائم علی شاہ، سعید غنی اور شہلا رضا نے کہا کہ 18اکتوبر 2007کو بے نظیر بھٹو تمام تر خطرات کے باوجود پاکستان آئیں۔ عوام کے جم غفیرنے ان کا استقبال کیا اور اس دن ایک بڑا سانحہ رونما ہوا جس میں سیکڑوں افراد شہیداور زخمی ہوئے،ان شہدا نے ملک میں جمہوریت کی بحالی کے لیے قربانی دی جسے ہمیشہ یاد رکھا جائیگا۔
پیپلز پارٹی کے رہنماؤں نے کہا کہ پیپلز پارٹی کی قربانی کی وجہ سے ملک میں جمہوریت قائم ہے اور جمہوریت کے خلاف ہر ساز ش کو عوام کے تعاون سے ناکام بنائیں گے، انھوں نے کہا کہ آج کو پیپلز پارٹی حیدر آباد میں عوامی طاقت کا مظاہرہ کرے گی اور آئندہ الیکشن میں پیپلز پارٹی کراچی سمیت ملک بھر سے بھرپور کامیابی حاصل کرے گی۔