پٹوار سرکل کاہنہ میں بڑے پیمانے پر صوبائی حکومت کی ملکیتی اراضی ہتھیانے کا انکشاف

بورڈ آف ریونیو کے شعبہ اشتمال کے پٹوار سرکل کاہنہ میں بڑے پیمانے پر صوبائی حکومت کی ملکیتی اراضی ہتھیانے کا انکشاف،کاہنہ پٹوار سرکل میں تعینات رہنے والے ریونیو سٹاف نے سینکڑوں فرضی افراد کو صوبائی حکومت کی زمین کا مالک بنادیا ۔ ڈسٹرکٹ ایڈمنسٹریشن پنجاب حکومت کی ملکیتی زمین سے محروم ہونے کے حوالے سے لاعلم نظر آئی ۔مزید معلوم ہوا ہے کہ محکمہ ریونیو کے شعبہ اشتمال کے پٹوار سرکل کاہنہ میں صوبائی حکومت کی سینکڑوں کنال سرکاری اراضی خرد بدر کرنے کا انکشاف ہوا ہے۔ پٹوار سرکل کاہنہ میں انتقال نمبر5181کے ذریعے مختلف علاقائی بااثر لینڈ مافیا اور ریونیو سٹاف کے قریبی رشتہ داروں نے سرکاری اراضی کی آپس میں بندر بانٹ کرلی ہے

اور گزشتہ دس سالوں کے دوران پٹوار سرکل کاہنہ میں تعینات رہنے والے ریونیو سٹاف ،پٹواری، قانگو اور نائب تحصیلدار ان نے بھی اپنے اپنے حصہ لے کر سرکاری اراضی کو فروخت کرنے میں اہم کردار ادا کیا اورسرکاری زمین کی خریدوفروخت کی لوٹ سیل لگادی ہے۔ ذرائع نے مزید انکشاف کیا کہ بورڈ آف ریونیو پنجاب کے ایک فرضی حوالہ جات کے ذریعے سرکاری اراضی کی الاٹمنٹ کی گی اور باقاعد ہ منصوبہ بندی کے تحت پٹواریوں نے بیع دربیع انتقالات کرتے ہوئے پنجاب حکومت کو ناقابل تلافی نقصان پہنچایا قابل ذکر بات یہ ہے کہ کلکٹر اشتمال غلام سرور سمیت ایڈیشنل ڈپٹی کمشنر لاہور اور ڈپٹی کمشنر لاہور سمیر احمد بھی اس بندر بانٹ کے حوالے سے تاحال لاعلم نظر آرہے ہیں۔ دوسری جانب کلکٹر اشتمال کا کہنا تھا کہ روزنامہ پاکستان کی نشاندہی پر فوری نوٹس لیا جائے گا اورسرکاری اراضی کی فرد فروخت میں ملوث سرکاری ملازمین کے خلاف مقدمات کااندراج کیا جائے گا۔