منگھوپیر میں سی ٹی ڈی سے مقابلے میں 2 دہشتگرد ہلاک

کراچی: سی ٹی ڈی نے منگھوپیر میں مقابلے کے دوران کالعدم تنظیم کے 2 دہشت گردوں کو ہلاک کرنے کا دعویٰ کیا ہے۔
ایس ایس پی کاؤنٹر ٹیررازم ڈیپارٹمنٹ (سی ٹی ڈی) عمر شاہد کے مطابق کراچی کے علاقے منگھوپیر میں دہشت گردوں کی موجودگی کی اطلاع پر رات گئے کارروائی کی گئی تو علاقے میں چھپے دہشت گردوں نے پولیس اہلکاروں پر فائرنگ کردی جس کے بعد جوابی فائرنگ کے نتیجے میں 2 دہشت گرد مارے گئے۔
عمر شاہد نے بتایا کہ ہلاک ہونے والے دہشت گرد کالعدم تحریک طالبان مفتی شاکر گروپ کے لیے کام کرتے تھے جن کی شناخت جبار اور دانیال کے نام سے ہوئی ہے جب کہ جبار گروہ کا سرغنہ تھا۔
ایس ایس پی کے مطابق دہشت گردوں کے قبضے سے دو ہتھیار بھی برآمد کیے گئے ہیں جن کی فارنزک رپورٹ آگئی ہے۔ رپورٹ کے مطابق ان ہتھیاروں کو پہلے بھی ٹارگٹ کلنگ کی وارداتوں میں استعمال کیا گیا ہے۔
عمر شاہد نے بتایا کہ گزشتہ ہفتے کراچی میں کمیونٹی سینٹر پر حملے کا منصوبہ بنانے والے ہلاک دہشت گرد بھی اسے گروپ سے تعلق رکھتے تھے جب کہ ابوالحسن اصفہانی روڈ اور کورنگی میں پولیس اہلکاروں کے قتل میں بھی یہی گروپ ملوث ہے۔
ایس ایس پی کے مطابق ہلاک ہونے والے دہشت گرد کراچی میں عبادت گاہوں اور فورسز پر حملہ کرنے کا منصوبہ بنارہے تھے۔

یہ بھی پڑھیں

پاکستان اور نیوزی لینڈ کے درمیان پہلا ٹیسٹ ڈرا ہوگیا

 کراچی: پاکستان اور نیوزی لینڈ کے درمیان دو میچوں پر مشتمل سیریز کا پہلا ٹیسٹ میچ …