پاکستانی قوم نے دہشت گردی کے ناسور کا ڈٹ کر مقابلہ کیا اور اسے شکست دی، راحیل شریف

اسلام آباد(میڈیا نائن ٹو ڈاٹ ٹی وی) اسلامی ممالک کے فوجی اتحاد کے سربراہ اور سابق آرمی چیف جنرل ریٹائرڈ راحیل شریف کا کہنا ہے کہ پاکستانی قوم نے دہشت گردی کے ناسور کا ڈٹ کر مقابلہ کیا اور اسے شکست دی۔اسلام آباد میں اسلامک ملٹری کاؤنٹر ٹیرارزم کولیشن کانفرنس سے خطاب کرتے ہوئے جنرل (ر) راحیل شریف کا کہنا تھا کہ دنیا بھر میں دہشت گردی کے ناسور سے سب سے زیادہ مسلم امہ متاثر ہوئی ہے، گزشتہ 6 برسوں میں دہشت گردی سے ہونے والی اموات میں سے 70 فیصد اموات مسلم ممالک میں ہوئیں، پاکستانی عوام اور افواج نے بھی بے پناہ قربانیاں دیں، پاکستانی قوم نے دہشت گردی کے ناسور کا ڈٹ کر مقابلہ کیا اور اسے شکست دی۔
راحیل شریف کا کہنا تھا کہ دہشت گردی کے ناسور سے نمٹنے کے لئے تمام ریاستیں انفرادی طور پر کام کررہی ہیں لیکن انفرادی طور پر اس سے نمٹنے کے لئے مسلم ریاستوں کے پاس وسائل نہیں ہیں، اس لئے اسلامی ممالک کا اتحاد بنایا گیا جو کسی ملک یا مسلک کے خلاف نہیں بلکہ دہشت گردی کے خلاف ہے، یہ اتحاد اپنے اتحادیوں کو دہشت گردی نمٹنے کے لئے انٹیلی جنس کا تبادلہ اور استعداد بڑھانے میں تعاون کرے گا۔