پشاور؛ خودکش حملے میں ایڈیشنل آئی جی اشرف نوراورمحافظ شہید

پشاور(میڈیا نائن ٹو ڈاٹ ٹی وی) حیات آباد میں زرغونی مسجد کے قریب بم دھماکا ہواہے جس کے نتیجے میں ایڈیشنل آئی جی ہیڈ کوارٹر محمداشرف نورمحافظ سمیت شہید ہوگئے۔ ذرائع کے مطابق پشاور کے علاقے حیات آباد میں صبح 9 بجے ایڈیشنل آئی جی ہیڈ کوارٹر اشرف نور اپنے گھر سے دفتر جارہے تھے کہ راستے میں زرغونی مسجد کے سامنے موٹر سائیکل سوار خودکش حملہ آور نے ان کی گاڑی کے قریب خود کودھماکے سےاڑالیا۔ حملے میں ایڈیشنل آئی جی ہیڈ کوارٹر محمد اشرف نور اپنے گن مین سمیت شہید اور 6 پولیس اہلکار زخمی ہوگئے۔ سی سی پی او پشاورطاہرخان نے میڈیا سے گفتگو کرتے ہوئے اسے خودکش حملہ قراردیا۔
واقعے کی اطلاع ملتے ہی ایمبولینس، ریسکیو اہلکار اور پولیس کی بھاری نفری موقع پر پہنچ گئی۔ دھماکے کی شدت اتنی زیادہ تھی کہ آس پاس کی عمارتیں لرز اٹھیں اورعمارتوں کے شیشے ٹوٹ گئے۔
پولیس کے مطابق شہید ایڈیشنل آئی جی محمد اشرف نور کی میت اور زخمی ہونےوالے تمام افراد کو حیات آباد میڈیکل کمپلیکس منتقل کردیا گیا ہے۔ جب کہ پولیس نے علاقے کو گھیرے میں لے کرجائے وقوع سے شواہد اکٹھے کرکے تحقیقات شروع کردی ہیں۔