پب جی کھلینے سے منع کرنے پر بیٹے نے باپ پر چاقو سے حملہ کردیا

آن لائن گیمز کی لت بچوں اور نوجوان نسل کو بے راہ روی کا شکار کررہی ہے جس سے گیمز کے شوقین بچوں اور نوجوانوں کے رویے میں اشتعال انگیزی بڑھ رہی ہے۔

حال ہی میں بھارت سے تعلق رکھنے والے ایک نوجوان نے پب جی گیم کھیلنے سے منع کرنے پر اپنے باپ پر چاقو سے حملہ کر دیا۔

بھارتی میڈیا رپورٹس کے مطابق عامر نامی نوجوان نے اپنے باپ کو چاقو سے زخمی کرنے کے بعد خود کی گردن پر بھی چاقو مار لیا جس کے بعد ان دونوں کو میرَٹھ میڈیکل اسپتال منتقل کیا گیا۔

میڈیا رپورٹس کے مطابق عامر کے والد عرفان نے اسے گھنٹوں گیم کھیلنے سے منع کیا تھا جس کے بعد اس نے اپنے والد پر حملہ کرنے کے ساتھ اپنی گردن پر بھی چاقو مارا اور اب عامر کی حالت تشویش ناک ہے۔

پولیس کے مطابق نوجوان کے گھر والوں کا کہنا ہے کہ وہ منشیات کی لت میں بھی مبتلا ہے اور وہ اس لت کو ختم کرنے کے لیے علاج بھی کروا رہا ہے۔