مون سون سے قبل برساتی نالے صاف کرانے کی ہدایت

لاہور(میڈیا92نیوز رپورٹ) صوبائی وزیر لوکل گورنمنٹ وکمیونٹی ڈویلپمنٹ محمد منشاءاللہ بٹ نے کہا ہے کہ مون سون شروع ہونے سے قبل تمام بلدیاتی ادارے اپنے اپنے علاقے میں گندے پانی کے نکاس کے نالوں کی صفائی کا عمل شروع کردیں تاکہ گندے پانی کے نکاسی کے بہاﺅ میں کسی قسم کی رکاوٹ نہ ہونے پائے ۔انہوںنے کہا کہ تمام بلدیاتی ادارے فوری طورپر تجاوزات کے خاتمہ میں بھی لحاظ وبلا تفریق تیزی لائیں۔ کرپٹ مافیا دوبارہ تجاوزات کے سلسلے میں مددگار ثابت ہوا تو اس کے خلاف یکطرفہ کارروائی عمل میں لائی جائےگی۔ انہوں نے کہا کہ وزیراعلیٰ صوبہ پنجاب کو صفائی ستھرائی کے معاملے میں دیگر صوبوں کے لئے رول ماڈل بنانا چاہتے ہیں۔ بنیادی سطح پر عوام کو ہر قسم کی سہولیات کی فراہمی حکومت کا نصب العین ہے اس سلسلے میں کسی قسم کی کوتاہی برداشت نہ کی جائے گی۔ انہوں نے کہا کہ تمام یوسیز سے تجاوزات کے خاتمہ کی رپورٹ طلب کی جائےگی۔ اور اچانک انسپکشن کے دوران کسی قسم کی بھی کوتاہی پائی گئی تو متعلقہ افسران کے خلاف سخت ایکشن لیا جائے گا۔