11ہسپتالوں کے15آپریشن تھیٹرز میں صفائی کے غیر تسلی بخش انتظامات پر ہر قسم کی سرجری کی سہولیات معطل

لاہور(رپورٹ:ماجد بٹ،میڈیا92نیوز) پنجاب ہیلتھ کیئر کمیشن نے اپنی ان سیپ کشن کی جاری مہم کے دوران11ہسپتالوں کے15آپریشن تھیٹرز میں صفائی کے غیر تسلی بخش انتظامات پر ہر قسم کی سرجری کی سہولیات معطل کردیں اور 33ہسپتالوں کو فراہمی صحت کی سہولیات کے کم سے کم معیارات پر عملدرآمد نہ کرنے پر اظہار وجوہ کے نوٹسز بھی جاری کردئیے۔ ان میں7ہسپتال ایسے بھی ہیں جنہیں میڈیکل فضلات کو ٹھکانے لگانے کے درست انتظامات نہ ہونے پر نوٹسز جاری کیے گئے ہیں۔ پنجاب ہیلتھ کیئر کمیشن کی ٹیموں نے دوروز میں رحیم یارخان،فیصل آباد، اوکاڑہ، خانیوال، گجرات، گوجرانوالہ، ملتان، بہاولپور، نارووال، جہلم، منڈی بہائوالدین، چنیوٹ، رحیم یارخان، سرگودھا، پاکپتن، سیالکوٹ اورراولپنڈی میں37سرکاری اور نجی ہسپتالوں کا معائنہ کیا گیا۔ ان میں سے تحصیل ہیڈکوارٹرز ہسپتال عارف والا ، کوٹ مومن، بھاکٹاں والا، ساہیوال،(سرگودھا) کبیروالا اور سرائے عالمگیر کا ایک ایک آپریشن تھیٹر جبکہ بیوال انٹرنیشنل ہسپتال گجر خان کے دو دوآپریشن تھیٹرز میں سرجری روک دی گئی ہے۔ ان ہسپتالوں کو پنجاب ہیلتھ کیئر کمیشن نے یہ حکم بھی دیا ہے کہ ان تمام تھیٹرز میں صفائی کے انتظامات معیار کے مطابق یقینی بنائے جائیں اور پنجاب ہیلتھ کیئر کمیشن کو لیبارٹری رپورٹ بھجوائی جائے۔ جن سات ہسپتالوں کو میڈیکل فضلاء کو ٹھکانے لگانے کے درست انتظامات نہ ہونے پر بھی نوٹسز جاری کیے گئے ہیں۔ ان میں بیوال انٹرنیشنل ہسپتال گجرخان، تحصیل ہیڈکوارٹر ہسپتال کوٹ مومن، بھاگٹاں والا، ساہیوال(سرگودھا)اور کبیر والا ، نشتر انسٹیٹیوٹ آف ڈینسٹری ملتان اور ملتان انسٹیٹیوٹ آف کڈنی ڈزیزز شامل ہیں۔ یاد رہے کہ جنوری میں پنجاب ہیلتھ کیئر کمیشن نے232سرکاری اور نجی ہسپتالوں کی انسب یکشنز مکمل کی ہیں اور192آپریشن تھیٹرز میں سرجری معطل کرنے کے علاوہ199ہسپتالوں کو اظہار وجوہ کے نوٹسز جاری کیے ہیں۔