محکمہ صحت: تحصیل ہیڈکوارٹرہسپتالوں کی اپ گریڈیشن کاغذوں تک محدود،اعلیٰ حکام کی سست روی

لاہور(جنرل رپورٹر) محکمہ پرائمری اینڈ سیکنڈری ہیلتھ کیئر کے زیر انتظام تحصیل ہیڈکوارٹر ہسپتالوں کی بحالی کا منصوبہ کھٹائی میں پڑگیا ہے۔ حکام کی سست روی کے باعث ہسپتالوں کی اپ گریڈیشن صرف کاغذوں تک ہی محدود ہے۔ اربوں کی لاگت کا تخمینہ تو لگایا گیا۔ محکمہ پرائمری اینڈ سیکنڈری ہیلتھ کیئر کی جانب سے ٹی ایچ کیو کی بحالی کیلئے تاحال کوئی پلان نہ بنایاجاسکا۔ تفصیلات کے مطابق لاہور اور پنجاب بھر میں قائم تحصیل ہیڈکوارٹر ہسپتالوں کی بحالی کے لیے پنجاب حکومت کی جانب سے 17ارب روپے کا تخمینہ لگایا گیا جس کیلئے ابتدائی طور پر رواں مالی سال کے دوران چار ارب روپے پراجیکٹ پر خرچ کئے جاچکے تھے۔ منصوبے کے تحت ٹی ایچ ہسپتالوں کی استعداد کار، بیڈز میں اضافہ، نئی عمارتیں اور ڈاکٹرز سمیت نرسز کی تعداد بھی بڑھائی جاتی تھی۔ منصوبے کے لئے محکمہ صحت کی جانب سے ایک پائی بھی جاری نہیں کی گئی۔ محکمہ پی اینڈ ڈی کے حکام کا کہنا تھا کہ محکمہ صحت کی جانب سے ٹی ایچ کیو کی بحالی کیلئے تاحال کوئی پلان نہیں بنایا گیا، پی اینڈ ڈی بورڈ کی جانب سے متعدد بار باور کرائے جانے کے باوجود کچھ نہ ہوسکا۔ محکمہ صحت کے حکام کا کہنا ہے کہ اس سے قبل وہ ڈی ایچ کیو ہسپتالوں کی بحالی پر کام کررہے ہیں۔